RBC Royal Bank cu su di 5 edicion di ‘Move pa Bida’ pa recauda fondo pa  Koningin Wilhelmina Fonds y Stichting BOB

RBC Royal Bank cu su di 5 edicion di ‘Move pa Bida’ pa recauda fondo pa Koningin Wilhelmina Fonds y Stichting BOB

Den cuadro di concientisacion tocante cancer

RBC Royal Bank cu su di 5 edicion di ‘Move pa Bida’ pa recauda fondo pa

Koningin Wilhelmina Fonds y Stichting BOB

Oranjestad, 5 di october 2014 – Durante un conferencia di prensa dialuna mainta Sra. Rose-Ann Woorts-Ruiz di RBC Royal Bank Aruba N.V conhuntamente cu Sra. Lilian Prince di Koningin Wilhelmina Fonds y Sr. Idelle Orman di Stichting BOB a elabora riba e di cinco edicion di e evento ‘Move pa Bida Zumba Fundraising event’.

RBC Royal Bank pa varios aña caba ta sostene e lucha contra cancer y ademas di recauda fondo pa medio di evento aki, RBC kier crea concientisacion pa e cuido y prevencion di cancer aki na Aruba.

Sra. Rose-Ann Woorts-Ruiz di RBC a menciona durante e conferencia: “Nos tin hopi fundacion na Aruba cu ta haci tremendo trabou y nos tur sa cu no ta facil pa nan haya suficiente fondo pa nan por maneha e fundacion debidamente. Pesey e biaha aki nos a dicidi pa tur fondo recauda durante e evento aki bay pa Stichting BOB y Koningin Wilhelmina Fonds.”

Sra. Idelle Orman di Stichting BOB a gradici RBC pa nan aporte. Principalmente mirando cu ainda nan falta fondo pa cubri gastonan di e software pa e machin di mammografía. Desde dia 1 di november tur ser femenino aki na Aruba entre e edad di 45 pa 75 aña lo ricibi un invitacion pa bin haci test pa nan pecho cu e machin di mammografia di Stichting BOB.

Di parti Koningin Wilhelmina Fonds Sra. Lilian Prince a indica cu e situacion di e malesa di cancer aki na Aruba ta basta grave. Nan fundacion ta yuda tanto hoben como adulto cu ta pasando den e malesa aki den diferente manera. Por ehemplo cu prothese, transporte, viahe y mucho mas. Pues mas cu claro KWF ta sumamente feliz cu e contribucion di parti RBC.

E evento e aña aki lo tuma luga riba diaranson 21 di october di 7or pa 8 y mey di anochi na Aruba Entertainment Center Dakota. E biaha aki pa e di 5 edicion RBC a escohe e tema di “Local Edition”; un evento di Zumba cu lo consisti di 5 instructornan local y 5 cantantenan local. E instructornan lo ta Rose-Ann Ruiz, Roshen Donata, Denise Krosendijk, Blanche Peters y Haysem Winterdaal y e artisnan local lo ta entre otro Ofo Escudero di NFUSION, Mitchel Almary di Tsunami, Cesar Olarte, Johel El Flow y Janiro Eisden. Tambe DJ 101 lo tey presente pa entrene un y tur cu su bon musica.

Bendemento di ticket lo tuma lugar na RBC Sasaki Branch situa na Italiestraat 36. Esaki lo tuma lugar desde 9 di october te cu 20 di october, di 9or di mainta te cu 4or di atardi. Tambe tur interesado por pasa na Koningin Wilhelmina Fonds of IBISA pa busca nan entrada y t-shirt.

E prijs di entrada ta solamente Afl.15 y esaki ta inclui tambe un t-shirt, bebida y snacks saludable durante e evento y pa solamente Afl.5 florin adicional bo por haya un dri-fit t-shirt.

RBC ta invita henter e pueblo di Aruba pa participa na e tremendo evento aki cu danki na cooperacion di

High Performance, Arubazumba Fitness, Cool F.M.,  Splenda, Goisco, Gatorade y Party Express ta posibel! Bin cu bo grupo di amigonan y famia y bin baila pa un bon causa! Hunto nos ta move pa bida!